उतूर जवळील कार अपघातात कुडाळच्या युवकाचा मृत्यू

उत्तूर / प्रतिनिधी : उत्तूर (ता. आजरा) गावाजवळ कार पलटी होवून झालेल्या अपघातात रोहित रमाकांत कुडाळकर (वय 25, रा. कुंभारवाडी, ता. कुडाळ, जि. ...

उत्तूर / प्रतिनिधी : उत्तूर (ता. आजरा) गावाजवळ कार पलटी होवून झालेल्या अपघातात रोहित रमाकांत कुडाळकर (वय 25, रा. कुंभारवाडी, ता. कुडाळ, जि. सिंधुदुर्ग) याचा जागीच मृत्यू झाला. पहाटे चार वाजता स्मशानभूमीजवळ हा अपघात घडला. यामध्ये चालक ओंकार मेघनाथ वालावलकर (वय 24 लक्ष्मीवाडी कुडाळ), जगन्नाथ सुर्यकांत पेडणेकर (वय 30, रा. कुडाळेश्वर, ता. कुडाळ), रघुनाथ बाबू कुंभार (वय 30 रा. कुंभारवाडी, ता. कुडाळ), बाबूराव सुभाष परब (वय 29, रा. नाबरवाडी, ता. कुडाळ) हे चौघजणे जखमी झाले. अपघाताची नोंद आजरा पोलिसांत झाली आहे.

कुडाळ येथील मित्र परिवार एकवीरा देवीचे दर्शन घेवून महाबळेश्वर-कोल्हापूर- आजरा मार्गे कुडाळकडे निघाले होते. उतूर जवळील एका धोकादायक  वळणावर चालकाचा गाडीवरील ताबा सुटून गाडी रस्त्याकडेला आसलेल्या सिमेंट पोलला धडकून चरीत पलटी झाली. यामध्ये रोहीत गाडीमधून बाहेर फेकला गेला. त्यामुळे तो गंभीर जखमी झाल्याने त्याचा जागीच मृत्यू झाला. इतर चौघेजण जखमी झाली. अपघाताचे वृत समजताच पोलीस व नागरिकांनी जखमींना 108 रुग्णवाहीकेतून उपजिल्हा रुग्णालय गडहिंग्लज येथे दाखल केले. चालकाने गाडी भरधाव वेगाने, अविचाराने चालवली व रोहीत याच्या मृत्यूस कारणीभूत ठरल्याने ओंकार वालावलकर याच्याविरोधात गुन्हा दाखल झाला आहे. पुढील तपास सहाय्यक फौजदार बी. एस. कोचरगी करत आहेत.