दिपक मदने (फलटण / प्रतिनिधी) : येथील तहसील कार्यालय फोडून तेथून 2 लाख 700 रुपये किमतीचे संगणक व अन्य साहित्य चोरून नेल्याच्या घटनेतील 1 लाख ...
दिपक मदने (फलटण / प्रतिनिधी) : येथील तहसील कार्यालय फोडून तेथून 2 लाख 700 रुपये किमतीचे संगणक व अन्य साहित्य चोरून नेल्याच्या घटनेतील 1 लाख 35 हजार रुपये किमतीचे काही संगणक व अन्य ऐवज फलटण जिनिंगच्या परिसरातील बंद इंजिन रुममध्ये बांधलेल्या पोत्यांमध्ये मिळून आला आहे.
29 जानेवारीच्या मध्यरात्रीनंतर चोरट्यांनी फलटण येथील तहसील कार्यालयातील संगणक, मॉनिटर, सीपीयू, युपीएस, लॅपटॉप, प्रिंटर, माऊस, चार्जर केबल, राऊटर असा दोन लाख 700 रुपयांचा ऐवज चोरून नेला होता. मुधोजी महाविद्यालयालगत असलेल्या फलटण जिनिंगच्या परिसरातील बंद इंजिन रुममध्ये मंगळवारी दुपारी दोन ते तीनच्या सुमारास एक मुलगा गेला असता त्यास तेथे काही पोती बांधून ठेवल्याचे दिसले. त्याने हा प्रकार घरी सांगितला असता त्याची माहिती पोलिसांना कळविली.
ही माहिती मिळताच फलटण शहर पोलीस ठाण्याचे अधिकारी व कर्मचारी तेथे गेले असता त्यांनी पाहिले असता त्या पोत्यांमध्ये मॉनिटर, संगणक, सीपीयू असा 1 लाख 35 हजार रुपये किमतीचा ऐवज मिळून आला व तो तहसील कार्यालयातील असल्याचे त्यावर लिहिलेले असल्याने समोर आले. तहसील कार्यालयातील अधिकार्यांनी पाहणी केली असता हा ऐवज कार्यालयातीलच असल्याचे त्यांनी स्पष्ट केले. अधिक तपास सपोनि एन. आर. गायकवाड करत आहेत.
