पुणे/प्रतिनिधी : जमीन खरेदी विक्रीच्या व्यवहारातील टोळीचे आर्थिक वर्चस्व कायम ठेवण्यासाठी तसेच पूर्वीच्या गुन्ह्याचा बदला घेण्यासाठी पप्प...
पुणे/प्रतिनिधी : जमीन खरेदी विक्रीच्या व्यवहारातील टोळीचे आर्थिक वर्चस्व कायम ठेवण्यासाठी तसेच पूर्वीच्या गुन्ह्याचा बदला घेण्यासाठी पप्पू गावडे खून प्रकरणामध्ये पौड येथे गुन्हा दाखल असलेल्या गजानन मारणेसह इतर आरोपींची पुणे येथील विशेष मोक्का न्यायालयाने निर्दोष मुक्तता केली आहे.
विशेष मोक्का न्यायाधीश ए. वाय. थत्ते यांनी हा निकाल दिला असून, पुराव्याअभावी आरोपींची मुक्तता केली असल्याचे मत न्यायालयाने नोंदवले आहे. या प्रकरणात आरोपीतर्फे अॅड सुधीर शहा, अॅड. विजयसिंह ठोंबरे, अॅड. विपुल धुशिंग व अॅड जितू सावंत, अॅड विद्याधर कोशे, अॅड. भरेकर यांनी कामकाज पाहिले. गजानन मारणे (वय 49), पप्पू उर्फ अतुल लक्ष्मण कुडले (वय 30), रूपेश कृष्णराव मारणे, संतोष विश्वनाथ शेलार, सुनील नामदेव बनसोडे, गणेश नामदेव हुंडारे (वय 32), प्रदीप दत्तात्रय कंधारे (वय 28), अनंता ज्ञानोबा कदम (वय 30), बाब्या उर्फ श्रीकांत संभाजी पवार (वय 27), बापू श्रीमंत बागल (वय 30), गोरक्षनाथ तुकाराम हाळंदे (वय 30), यशवंत उर्फ बाळा दासू बोकेफोडे (वय 30), उमेश नागू टेमधरे, सतीश उर्फ आबा शिळीमकर अशी निर्दोष सुटका केलेल्यांची नावे आहेत. या प्रकरणी नीलेश ज्ञानेश्वर जाधव यांनी पौड पोलिस ठाण्यात फिर्याद दिली होती. लवळे गावाच्या हददीतील गावडे वस्तीजवळ तीन नोव्हेंबर 2014 मध्ये जमीन खरेदी विक्रीच्या व्यवहारातील टोळीचे आर्थिक वर्चस्व कायम ठेवण्यासाठी तसेच पूर्वीच्या गुन्ह्याचा बदला घेण्यासाठी पप्पू उर्फ संतोष हिरामण गावडे याचा खून झाला.
