पुणे/प्रतिनिधी: राम मंदिरासाठी मुस्लिम संघटनेने देऊ केलेला सव्वा लाखांचा निधी राम मंदिराचे कोषाध्यक्ष गोविंदगिरी महाराज यांनी आज नाकारला. सं...
पुणे/प्रतिनिधी: राम मंदिरासाठी मुस्लिम संघटनेने देऊ केलेला सव्वा लाखांचा निधी राम मंदिराचे कोषाध्यक्ष गोविंदगिरी महाराज यांनी आज नाकारला. संघटनेने रोख रक्कम दिल्याने ती नाकारत चेकने पैसे द्यावेत, अशी विनंती त्यांनी केली. नवचैतन्य प्रकाशन आणि माईर्स एमआयटीच्या वतीने आयोजित कार्यक्रमात ज्येष्ठ पत्रकार लक्ष्मीकांत जोशी यांनी लिहिलेल्या एमआयटीचे संस्थापक अध्यक्ष डॉ. विश्‍वनाथ कराड यांच्या विश्‍वधर्मी विश्‍वनाथतत्त्व या पुस्तकाचे प्रकाशन करण्यात आले.
या वेळी राम जन्मभूमी तीर्थक्षेत्र ट्रस्टचे कोषाध्यक्ष डॉ. गोविददेव गिरी महाराज, राष्ट्रीय स्वयंसेवक संघाचे भय्याजी जोशी, ज्येष्ठ संगणकतज्ज्ञ डॉ.विजय भटकर, ज्येष्ठ दिग्दर्शक जब्बार पटेल, शिवाजी महाराज मोरे, प्रा. डॉ. एस.एन.पठाण, एमआयटीचे कार्याध्यक्ष राहुल कराड, मंगेश कराड आदी उपस्थित होते. या वेळी इंडियन मुस्लिम इन्टलेक्चुअल फोरम तर्फे राम मंदिराच्या निर्माणासाठी सव्वा लाखांचा निधी दान करण्यात आला. या निधीची रक्कम इंडियन मुस्लिम इंटलेक्च्युअल फोरमचे प्रा. पठाण यांच्या हस्ते गोविंददेव गिरी महाराज यांना सुपूर्द करण्यात आली; पण ही सगळी रक्कम रोख स्वरूपात असल्यामुळे ती रक्कम गोविंद महाराज यांनी तातडीने डॉ.कराड यांच्याकडे परत केली. माझ्याकडे अनेक मुस्लिम संघटनांनी यापूर्वी निधी सुपूर्द केला आहे. ही पहिलीच वेळ नाही; पण ही रक्कम रोख स्वरूपात असल्यास त्याचा हिशोब ठेवणे अडचणीचे होत आहे. त्यामुळे आतापर्यंत मी फक्त धनादेश स्वीकारलेले आहेत, असे स्पष्टीकरणदेखील गोविंदगिरी महाराजांनी या वेळी दिले. दरम्यान, यापुर्वीदेखील राममंदिर निर्माणासाठी अनेक मुस्लिम संघटनांतर्फे निधी दान करण्यात आला आहे. यामध्ये पुण्यातील विविध संघटनांचा समावेश आहे.
