पुणे/प्रतिनिधी : बांधकाम व्यवसायिक अविनाश भोसले यांच्या कार्यालयावर अंमलबजावणी संचलनालय अर्थात ईडीने छापेमारी केली आहे. ईडीचे अधिकारी सकाळी...
पुणे/प्रतिनिधी : बांधकाम व्यवसायिक अविनाश भोसले यांच्या कार्यालयावर अंमलबजावणी संचलनालय अर्थात ईडीने छापेमारी केली आहे. ईडीचे अधिकारी सकाळी साडेआठ वाजल्यापासून आयएल हाऊसमध्ये झाडाझडती करत आहेत. भोसले हे मोठे बांधकाम आणि हॉटेल व्यावसायिक आहेत. फेमासंबंधीच्या प्रकरणात त्यांची ईडीकडून चौकशी होत आहे. हे सहा वर्षांपूर्वीचे विदेशी चलन प्रकरण आहे.
केंद्रीय सुरक्षा दलाच्या गार्डचा पहारा सध्या या कार्यालयात आहे. विदेशी चलन प्रकारात चौकशी सुरू असताना ईडीचे पथक थेट पुण्यात तळ ठोकून बसल्याने, भोसले यांच्या अडचणीत आणखी वाढ होण्याची शक्यता आहे. दरम्यान, भोसले यांची यापूर्वीही ईडीने चौकशी केली होती. नोव्हेंबर महिन्यात तब्बल दहा तास त्यांच्यावर प्रश्‍नांची सरबत्ती केली होती. फेम कायद्यांतर्गत त्यांची चौकशी करण्यात आल्याचे वृत्त आहे. यापूर्वीही प्राप्तिकर विभागाने भोसले यांच्या घरावर छापा मारला होता. भोसले यांच्या पुणे आणि मुंबईतील 23 ठिकाणांवर प्राप्तिकर विभागाने धाडी मारल्या होत्या.
अविनाश भोसले यांच्यासह त्यांच्या मुलीला म्हणजेच राज्याचे कृषिराज्यमंत्री विश्‍वजीत कदम यांच्या पत्नी स्वप्नाली कदम यांनाही ईडीने नोटीस पाठवल्याची माहिती आहे. दोन आठवड्यापूर्वीच हे वृत्त आले होते; मात्र याबाबत विश्‍वजीत कदम यांनी कोणतीही प्रतिक्रिया दिली नव्हती. भोसले यांना ओळखणार्‍यांच्या म्हणण्यानुसार ते 80च्या दशकात रिक्षा चालवत होते. त्यानंतर त्यांचा बांधकाम व्यवसायाशी संबंध आला आणि ते सरकारी कंत्राटदार बनले. त्यानंतर त्यांनी मागे वळून पाहिले नाही. आज ते कोट्यवधी रुपयांच्या एबीआयएल ग्रुपचे मालक आहेत. पुण्यात त्यांना रिअल इस्टेट किंग म्हणून ओळखले जाते.
पुण्याच्या बाणेर येथे भोसले यांचा पॅलेस आहे. व्हाईट हाऊस असे त्याचे नाव आहे. सफेद रंगाच्या या पॅलेसचा लूक अमेरिकेच्या व्हाईट हाऊस सारखाच आहे. भोसले यांची कन्या स्वप्नाली हिचा विवाह माजी मंत्री, दिवंगत पतंगराव कदम यांचे चिरंजीव आणि काँग्रेस नेते विश्‍वजीत कदम यांच्याबरोबर झाला. पुण्यातील सर्वांत रॉयल विवाह सोहळा म्हणून हा विवाह सोहळा ओळखला जातो. या विवाहाला अभिनेता सलमान खान यांच्यासह तत्कालीन केंद्रीय मंत्रीही आले होते.
