नवीदिल्लीः भाजपचे खासदार उदयनराजे भोसले यांनी आज राष्ट्रवादी काँग्रेसचे अध्यक्ष शरद पवार यांची भेट घेतली. मराठा आरक्षणाच्या मुद्द्यावर आपण ...
नवीदिल्लीः भाजपचे खासदार उदयनराजे भोसले यांनी आज राष्ट्रवादी काँग्रेसचे अध्यक्ष शरद पवार यांची भेट घेतली. मराठा आरक्षणाच्या मुद्द्यावर आपण शरद पवार यांना भेटलो असल्याचे त्यांनी सांगितले.
या वेळी उदयनराजे म्हणाले, की पवार यांची भेट घेण्यामागचे कारण म्हणजे, मराठा समाजाच्या आरक्षणाचा मुद्दा होता. आमची एकच मागणी आहे, जेवढे गांभीर्याने महाराष्ट्र शासनाकडून बाजू मांडायला हवी होती, ती काही मांडली गेली नाही. त्यामुळे लोकांच्या मनात मोठी संभ्रमावस्था निर्माण झालेली आहे. मराठा समजातील लोकांची एवढीच अपेक्षा आहे, की अन्य समाजातील लोकांना ज्याप्रमाणे आरक्षण दिले गेले, त्याचप्रमाणे कुणाच्याही आरक्षणाला धक्का न लावता, आम्हालादेखील आरक्षण मिळाले पाहिजे. शरद पवार हे मराठा समाजातील ज्येष्ठ व राजकारणात सक्रिय आहेत व आज राज्यात राष्ट्रवादी काँग्रेस, शिवसेना व काँग्रेसची जी सत्ता आहे, त्याचे सर्वेसर्वा शरद पवार हे आहेत. त्यामुळे एक वडीलकीच्या नात्याने त्यांनी यामध्ये लक्ष घालावे. अन्यथा, फार मोठ्या प्रमाणावर उद्रेक होईल, असा इशारा त्यांनी दिला. या अगोदर शांततेत मोर्चे निघाले; पण जर आरक्षण मिळाले नाही तर काय होईल, हे सांगता येणार नाही, त्याची कल्पना देखील करता येणार नाही, असा इशारा उदयनराजे यांनी राज्य सरकारला दिला.
