प्रलंबित प्रश्‍नासह समस्या घेतल्या जाणून कराड / प्रतिनिधी : सातारा येथील सैनिक स्कूलला सातारचे खा. श्रीनिवास पाटील यांनी भेट देऊन तेथील प्र...
प्रलंबित प्रश्‍नासह समस्या घेतल्या जाणून
कराड / प्रतिनिधी : सातारा येथील सैनिक स्कूलला सातारचे खा. श्रीनिवास पाटील यांनी भेट देऊन तेथील प्रलंबित प्रश्‍न व समस्यांविषयी माहिती जाणून घेतली. सैनिक स्कूलच्या समस्या सोडवण्यासाठी शक्य ते सर्व प्रयत्न करणार असल्याचे आश्‍वासन यावेळी त्यांनी दिले. नुकतेच यासंदर्भात लोकसभेत आवाज उठवून खा. श्रीनिवास पाटील यांनी सभागृहाचे लक्ष वेधले होते. त्यानंतर त्यांनी प्रत्यक्ष सैनिक स्कूलला दिलेली ही भेट महत्वपूर्ण मानली जात आहे.
सातारा जिल्हा हा शूरवीरांचा आणि सैनिकांचा जिल्हा म्हणून ओळखला जातो. या जिल्ह्याने स्वातंत्र्योत्तर काळात लढाईमध्येही मोठे योगदान दिले आहे. ही परंपरा आपल्या सैनिकांनी आजतागायत सुरू ठेवली आहे. इतर जिल्ह्याच्या तुलनेत सातारा जिल्ह्यातून सैन्य दलात भरती होण्याचे प्रमाण प्रचंड आहे. सातारा येथे सैनिक स्कूल असून त्याची स्व. यशवंतराव चव्हाण यांनी सन 1961 मध्ये पायाभरणी केली होती. मात्र, ते चालवण्यासाठी पुरेसा निधी मिळत नाही. 40 वर्षापासून सेवा बजावलेल्या तेथील शिक्षकांना पेन्शन व इतर सोयीसुविधा मिळत नाहीत. त्यासंदर्भात खा. श्रीनिवास पाटील यांनी संबंधिताशी अनेकदा पत्रव्यवहार देखील केला आहे. त्यानंतर नुकत्याच झालेल्या लोकसभेच्या अधिवेशनात पहिल्यांदा त्यांनी हा मुद्दा उपस्थित करून याविषयी सभागृहाचे लक्ष वेधून घेत सैनिक स्कूलला ऊर्जितावस्था आणण्याची मागणी केली होती. त्यानंतर बुधवार, दि. 17 रोजी खा. श्रीनिवास पाटील यांनी प्रत्यक्ष सैनिक स्कूलला भेट देऊन पाहणी केली. तेथिल प्रलंबित प्रश्‍न व असलेल्या समस्यांची माहिती घेऊन त्या सोडवण्यासाठी शक्य ते सर्व प्रयत्न करणार असल्याचे आश्‍वासन त्यांनी दिले. यावेळी सैनिक स्कूलचे प्रिन्सिपल ग्रुप कॅप्टन उज्वल घोरमाडे, कॅप्टन प्रमोद पाटील उपस्थित होते.
