नवी दिल्ली : जैश-ए-मोहम्मदच्या दहशतवाद्यांनी राष्ट्रीय सुरक्षा सल्लागार अजित डोवाल यांच्या हत्येचा कट केला होता, असे उघड झाले आहे. त्यामुळे ...
नवी दिल्ली : जैश-ए-मोहम्मदच्या दहशतवाद्यांनी राष्ट्रीय सुरक्षा सल्लागार अजित डोवाल यांच्या हत्येचा कट केला होता, असे उघड झाले आहे. त्यामुळे डोवाल यांच्या ऑफिस आणि घराची सुरक्षा वाढवण्यात आली आहे. जम्मू काश्मीर पोलिसांनी काही दिवसांपूर्वीच जैशच्या एका दहशतवाद्याला स्फोटकांसह पकडले. त्याची चौकशी करताना पाकिस्तानच्या या कुरापतींचा गौप्यस्फोट झाला.
पकडण्यात आलेल्या दहशतवाद्याकडून मिळालेल्या माहितीनुसार, पाकिस्तानमधील एका हस्तकाच्या निर्देशावरुन आरोपीने राजधानी दिल्लीतील सरदार पटेल भवनासह अतिमहत्त्वाच्या ठिकाणांची रेकी केली होती. 2016 च्या उरी येथील सर्जिकल स्ट्राईक आणि 2019 च्या बालाकोट हल्ल्यानंतर डोवाल पाकिस्तानमधून चालणार्‍या दहशतवादी गटांच्या हिटलिस्टवर आले आहेत. डोवाल भारतातील सर्वांत सुरक्षित व्यक्तींपैकी एक आहेत. त्याची सुरक्षा व्यवस्था त्या मोजक्या लोकांपैकी आहे, ज्यांना 24 तास पूर्ण सुरक्षा पुरवली जाते. एनएसने या धोक्याबाबत सुरक्षा दलांना आणि गृह मंत्रालयाला माहिती दिली आहे. शोपिया भागात असलेल्या जैशचा मोरक्या हिदायत उल्लाह मलिकला सहा फेब्रुवारी रोजी अनंतनागमधून अटक करण्यात आली. त्याच्या चौकशीत त्याने डोवाल यांच्या कार्यालयाचा एक व्हिडीओ तयार केल्याचेही कबूल केले. मलिकविरोधात गंग्याल पोलिस ठाण्यात गुन्हा दाखल करण्यात आला आहे. मलिक जैशच्या लश्कर-ए-मुस्तफा नावाच्या उपशाखेचा प्रमुख आहे. त्याला अनंतनागमध्ये स्फोटकांसोबत पकडण्यात आले. अटक करण्यात आलेल्या दहशतवाद्याने सांगितले, की 24 मे 2019 रोजी मी श्रीनगरहून जम्मू काश्मीरसाठी इंडिगो विमानाने प्रवास केला. मला एनएस ऑफिस आणि तिथे तैनात सीआयएसएफच्या सुरक्षेचा व्हिडीओ काढायचा होता. तसेच हा व्हिडीओ पाकिस्तानमधील हस्तकांना पाठवायचा होता. त्यानंतर मी बसने काश्मीरला परत आलो. जम्मू काश्मीर पोलिसांनी केलेल्या चौकशीत आरोपी मलिकने सांगितले, की त्याने 2019 मध्ये उन्हाळ्यात समीर अहमद डारसोबत सांबा सेक्टरचीदेखील रेकी केली होती. डारला पुलवामामधील दहशतवादी हल्ल्यात सहभागी असल्याच्या आरोपाखाली आधीच 21 जानेवारी 2020 रोजी अटक करण्यात आले. मलिकने पाकिस्तानमधील दहशतवाद्यांच्या अनेक म्होरक्यांचे फोन नंबर आणि कोड नेम सांगितले आहेत..
