पुणे/प्रतिनिधीः संत तुकाराम महाराजांचे बरेचसे बालपण लोहगावात गेले. महाराज आजोळी व कीर्तनासाठी लोहगावमध्ये येत होते. तसेच गावची हजारो एकर जमी...
पुणे/प्रतिनिधीः संत तुकाराम महाराजांचे बरेचसे बालपण लोहगावात गेले. महाराज आजोळी व कीर्तनासाठी लोहगावमध्ये येत होते. तसेच गावची हजारो एकर जमीन लोहगाव विमानतळासाठी देण्यात आली आहे. याच पावनभूमीमध्ये विमानतळ उभे आहे. या पार्श्‍वभूमीवर लोहगाव विमानतळाला संत तुकाराम महाराज विमानतळ नाव द्यावे अशी मागणी अखिल भारतीय वारकरी मंडळ आणि लोहगाव ग्रामस्थांनी केली.
अखिल भारतीय वारकरी मंडळ पश्‍चिम महाराष्ट्र नियुक्तीपत्रक प्रदान व पदग्रहण सोहळा लोहगाव येथे आयोजित करण्यात आला होता. अध्यक्षस्थानी राष्ट्रीय कीर्तनकार व संस्थापक अध्यक्ष हभप.प्रकाश महाराज बोधले होते. या वेळी बहुसंख्येने कीर्तनकार, कथाकार, प्रवचनकार आणि ख्यातनाम गायक अशी पंचक्रोशीतून संतांची मांदियाळी आली होती. लोहगाव विमानतळाचे नाव जगदगुरु श्री संत तुकाराम महाराज विमानतळ करा या मागणीचा विचार करून हभप. प्रकाश बोधले महाराज, माजी आमदार जगदीश मुळीक, बापूसाहेब पठारे यांनी सहकार्य करण्याचे आश्‍वासन दिले. स्थानिक आमदार सुनील टिंगरे, उपमुख्यमंत्री अजित पवार व खासदार गिरीश बापट यांच्या माध्यमातून शासन दरबारी पाठपुरावा करण्याचे ठरविण्यात आले.
