पिंपरीत सर्वाधिक रुग्ण गृहविलगीकरणात

पुणे/प्रतिनिधीः पिंपरी शहरातील कोरोना रुग्णांची संख्या मागील काही दिवसांपासून वाढत आहे. रुग्ण संख्या वाढत असली, तरी सर्वाधिक रुग्ण हे लक्षणव...

पुणे/प्रतिनिधीः पिंपरी शहरातील कोरोना रुग्णांची संख्या मागील काही दिवसांपासून वाढत आहे. रुग्ण संख्या वाढत असली, तरी सर्वाधिक रुग्ण हे लक्षणविरहित आणि सौम्य स्वरूपाची लक्षणे असलेले आहेत. त्यामुळे शहरातील सर्वाधिक रुग्ण हे गृहविलगीकरणात आहेत. सध्या शहरात आठ हजार 797 रुग्ण सक्रिय आहेत. 

     यापैकी सहा हजार 911 रुग्ण हे गृहविलगीकरणात आहेत, तर एक हजार 886 रुग्ण हे शहरातील रुग्णालय आणि कोविड केअर सेंटरमध्ये उपचार घेत आहेत. गंभीर स्वरूपाची लक्षणे असलेल्या  रुग्णांचे प्रमाण कमी आहे. गृहविलगीकरणात कोणते नियम पाळावे, याची माहिती आता नागरिकांना झाली आहे. सुरुवातीला लक्षणविरहित आणि सौम्य स्वरूपाची लक्षणे असलेल्या रुग्णांनादेखील कोविड केअर सेंटरमध्ये ठेवले जात होते. त्यामुळे अनेक रुग्णांना दाखल करण्यासाठी जागा मिळत नव्हती; परंतु आता सर्वाधिक रुग्ण हे घरीच उपचार घेत असल्याने ज्या रुग्णांना घरी उपचार घेणे शक्य नाही, अशा रुग्णांना कोविड सेंटरमध्ये जागा मिळत आहे. गृहविलगीकरणात असलेल्या रुग्णांवर लक्ष ठेण्याचे काम महापालिका प्रशासन करीत आहे. असा रुग्ण बाहेर फिरताना आढळल्यास फौजदारी कारवाई करण्याचे आदेश काही दिवसांपूर्वी आयुक्तांनी दिले आहेत. त्याचबरोबर रुग्ण संख्येची साखळी तोडण्यासाठी कॉन्टॅक्ट ट्रेसिंग केले जात आहे. एक रुग्ण आढळल्यास साधारण दहा व्यक्तींचे कॉन्टॅक्ट ट्रेसिंग केले जात आहे. गंभीर रुग्णांसाठी नवीन जिजामाता आणि नवीन भोसरी रुगणालय येथे अतिदक्षता विभाग सुरू करण्याचेदेखील काम सुरू आहे. नोव्हेंबरमध्ये शहरातील कोरोना रुग्णाची संख्या कमी झाली होती. त्यामुळे शहरातून कोरोना संपला अशी स्थिती निर्माण झाली होती; परंतु फेब्रुवारीपासून रुग्ण संख्या अचानक वाढली. रोज होणारी वाढ लक्षात घेता महापालिकेने उपयोजना सुरू केल्या आहेत. शहरातील बंद असलेले कोविड सेंटर पुन्हा सुरू करण्याचा विचार प्रशासन करीत आहे. शहरात मुखपट्टीविना फिरणार्‍यांवर जोरात कारवाई सुरू आहे. कोरोना तपासण्या वढविण्यात आल्या आहेत. सध्या महापालिकेच्या आठही रुग्णालयात कोरोना तपासण्या सुरू आहेत. महापालकितेत पन्नास टक्के कर्मचार्‍यांना उपस्थित राहण्याचे आदेश दिले आहेत. रात्री दहानंतर संचारबंदी करण्यात येत आहे. नागरिकांनी विना कारण गर्दी करू नये अशा सूचना प्रशासनाने दिल्या आहेत.

धोका कमी 

कोरोनाची सर्वाधिक लागण ही 22 ते 39 या तरुण वयोगटाला झाली आहे. त्यामुळे ही गृहविलगीकरणात वाढ झाली आहे. तसेच तरुण वयोगटातील नागरिकांची रोगप्रतिकारक शक्ती जास्त असल्याने कोरोनाचा संसर्ग रोखता येईल, असे वैद्यकीय तज्ज्ञांचे म्हणणे आहे.