जळगाव / प्रतिनिधी : गेल्या अनेक दिवसांपासून प्रचंड गाजत असलेल्या जळगाव महापालिकेच्या महापौरपदी शिवसेनेच्या जयश्री सुनील महाजन यांची, तर उ...
जळगाव / प्रतिनिधी : गेल्या अनेक दिवसांपासून प्रचंड गाजत असलेल्या जळगाव महापालिकेच्या महापौरपदी शिवसेनेच्या जयश्री सुनील महाजन यांची, तर उपमहापौरपदी कुलभूषण पाटील यांची आज निवड करण्यात आली. शिवसेनेने ही ग्रँड फाईट 45 विरूद्ध 30 अशा फरकाने जिंकली. यामुळे महापालिकेवर भगवा फडकला आहे.
महापालिकेत भाजपला असणारे भक्कम बहुमत पाहता महापौर आणि उपमहापौरपदाची निवडणूक बिनविरोधी होण्याची शक्यता होती. पक्षाचे महानगराध्यक्ष दीपक सूर्यवंशी यांनी या पदांसाठी अर्ज घेतानादेखील असाच दावा केला होता. अर्थात, दोन्ही पदांसाठी नवनवीन नावे समोर आल्यामुळे प्रचंड चुरस निर्माण झाली. यातच पाच दिवसांपूर्वी भाजपमध्ये उभी फूट पडण्याचे संकेत मिळताच खळबळ उडाली. शिवसेनेने असंतुष्ट भाजप नगरसेवक कुलभूषण पाटील आणि इतरांच्या मदतीने भाजपला हादरा दिला. भाजपने यासाठी डॅमेज कंट्रोल करण्याचे सर्व प्रयत्न अयशस्वी ठरले. काल शिवसेनेतर्फे महापौरपदासाठी जयश्री महाजन तर उपमहापौरपदीासाठी कुलभूषण पाटील यांना उमेदवारी जाहीर केली. भाजपने पहिल्यांदा दोन उमेदवार उतरवण्याचे संकेत दिले, तर रात्री उशीरा या दोन्ही पदांसाठी अनुक्रमे प्रतिभा कापसे आणि सुरेश सोनवणे यांना उमेदवारी दिली; मात्र शिवसेनेकडे असणारे भक्कम बहुमत पाहता त्यांच्या उमेदवारांचा विजय निश्‍चित मानला जात होता. आज नेमके तेच घडले.
मतदान होण्याआधी सभागृहात मोठा गदारोळ झाला. भाजपने पहिल्यांदा शिवसेनेच्या दोन्ही उमेदवारांच्या अर्जावर आक्षेप घेत ते रद्द करण्याची मागणी केली; मात्र ही मागणी पीठासीठ अधिकारी, जिल्हाधिकारी राऊत यांनी फेटाळून लावली. निवड प्रक्रिया सुरू असताना स्थायी समिती सभापती राजेंद्र घुगे पाटील यांनी ही ऑनलाईन सभा बेकायदेशीर असून भाजप याच्या विरोधात न्यायालयात जाणार असल्याची माहिती दिली. ही निवड निवडणूक अधिनियम 2005 च्या प्रमाणे होत नसल्याने आपण कायदेशीर कारवाई करणार असल्याचे ते म्हणाले. याप्रसंगी प्रत्येक उमेदवारांची खातरजमा करून त्यांनी या दोन्ही पदांसाठी नेमके कुणाला मत दिले याची माहिती जाणून घेतली. ही प्रक्रिया पार पडल्यानंतर महापौरपदी महाजन तर उपमहापौरपदावर पाटील यांची निवड जाहीर करण्यात आली.
खड़से यांच्या एका फोनची कमाल
राष्ट्रवादी काँग्रेसचे ज्येष्ठ नेते एकनाथ खडसे यांनी 15 दिवसांपूर्वी मुख्यमंत्री उद्धव ठाकरे यांना फोन केला होता. त्यांनी जळगावातील रस्त्यांचे तसेच अन्य प्रश्‍न मांडले. तेव्हा जळगावच्या महापौरपदाची निवडणूक आणि भाजपतील नाराज नगरसेवकांची माहिती खडसे यांनी ठाकरे यांना दिली. खडसे यांनी वारंवार बैठका घेऊन गुलाबराव पाटील, विनायक राऊत आणि एकनाथ शिंदे यांच्या संपर्कात राहून जळगावमध्ये शिवसेनेच्या हाती सत्ता आणून दिली. भाजपला हा जोरदार तडाखा देऊन सांगलीची पुनरावृत्ती घडविली.
भिवंडीतही भाजप तोंडघशी
भिवंडी महानगरपालिकेचे सभागृह नेतेपद स्वीकारण्यास भाजपने नकार दिला. ठराविक नावाचाच आग्रह भाजपने धरला. त्यामुळे महापौरांनी अवघ्या पाच दिवसांत आपला निर्णय बदलून कोणार्क विकास आघाडीमधील विकास निकम यांच्या नियुक्तीची घोषणा केली. मोठे शक्तिप्रदर्शन करत विकास निकम यांनी महापौर प्रतिभा पाटील कोणार्क विकास आघाडीचे प्रमुख विलास पाटील यांसह नगरसेवक यांच्या उपस्थितीत सभागृह नेतेपदाचा पदभार कार्यालयात स्वीकारला.
