पुणे/प्रतिनिधी: महाराष्ट्र लोकसेवा आयोगाची परीक्षा पुढे ढकल्यानंतर पुण्यात विद्यार्थ्यांनी आंदोलन केले. या आंदोलनामुळे कोरोनाचा फैलाव झाल्...
पुणे/प्रतिनिधी: महाराष्ट्र लोकसेवा आयोगाची परीक्षा पुढे ढकल्यानंतर पुण्यात विद्यार्थ्यांनी आंदोलन केले. या आंदोलनामुळे कोरोनाचा फैलाव झाल्याचा संशय व्यक्त केला जात आहे. कारण या आंदोलनावेळी उपस्थित असलेल्या पोलिसांना कोरोनाची लागण झाली आहे. त्यामुळे पुणे प्रशासनाची चिंता आणखी वाढली आहे.
लोकसेवा आयोगाची परीक्षा पुढे ढकलल्यानंतर पुण्यात मोठ्या संख्येने विद्यार्थी रस्त्यावर उतरले होते. या वेळी विद्यार्थ्यांनी मोठे आंदोलन केले. तब्बल आठ तास पुण्यातील प्रमुख असलेला लालबहादूर शास्त्री रस्ता विद्यार्थ्यांनी अडवून ठेवला होता. त्यानंतर या आंदोलनावर नियंत्रण मिळवण्यासाठी मोठ्या संख्येने पोलिस बंदोबस्तही तैनात करण्यात आला होता. या आंदोलनादरम्यान कोरोनाच्या नियमांचे उल्लंघन झाले होते. त्याचाच परिणाम म्हणून पुणे पोलिस दलातील तब्बल पाच कर्मचारी कोरोनाबाधित झाले आहे. यातील तिघे जण हे वरिष्ठ अधिकारी आहेत. आंदोलन संपल्यानंतर या पोलिस कर्मचार्‍यांना कोरोनाची सौम्य लक्षणे जाणवू लागली होती. त्यानंतर त्यांनी कोरोना चाचणी केली असता हे पाचही जण कोरोनाबाधित असल्याचे निष्पन्न झाले.
