मुंबई/प्रतिनिधीः कोरोनाबाधितांचा आकडा वाढू लागताच पुन्हा एकदा बेडची उपलब्धता हा प्रश्‍न मुंबईकरांना सतावू लागला आहे. पालिकेकडून सरकारी तसेच ...
मुंबई/प्रतिनिधीः कोरोनाबाधितांचा आकडा वाढू लागताच पुन्हा एकदा बेडची उपलब्धता हा प्रश्‍न मुंबईकरांना सतावू लागला आहे. पालिकेकडून सरकारी तसेच खासगी अशी दोन्ही रुग्णालयांमधील बेडस् कोरोनासाठी ताब्यात घेतले आहेत; मात्र तरीदेखील रुग्णांना बेड उपलब्ध होत नसल्याच्या तक्रारी आहेत. त्यामुळे मुंबईत बेडस्चा तुडवडा निर्माण झाल्याचा निष्कर्ष काढला जात आहे; मात्र त्यावर पालिका आयुक्त इक्बालसिंह चहल यांनी स्पष्टीकरण दिले. मुंबईत बेडस्ची कोणतीही कमतरता नसून फक्त नागरिकांनी बेडस् मिळवताना प्रोटोकॉल पाळला तर बेडस् मिळणार नाही असे होणार नाही, असे ते म्हणाले. महापालिकेने तयार केलेल्या वॉर्डस्तरीय टीमच्या माध्यमातूनच प्रयत्न करण्याचे चहल यांनी केले आहे.
पालिका आयुक्तांनी दिलेल्या आकडेवारीनुसार गेल्या 24 तासांमध्ये मुंबईत दहा हजार शंभर करोनाबाधित सापडले आहेत; मात्र त्यापैकी आठ हजार सातशे रुग्णांना कोणतीही लक्षणे नाहीत. हे रुग्ण त्यांच्या घरीच विलगीकरणात राहतात. उरलेल्या तेराशे बाधितांना लक्षणे दिसत आहेत. त्यातूनही साधारणपणे निम्म्या लोकांकडून हॉस्पिटलमध्ये बेडस्ची मागणी केली जाते. उरलेले लोक गृहविलगीकरणात राहणे पसंत करत आहेत. त्यामुळे 600 ते 700 रुग्णांसाठीच बेडस् उपलब्ध करून द्यावे लागतात. त्यासोबतच रोज बरे होऊन जाणार्‍या रुग्णांचे बेडस् रिकामे होत असतात. त्यानुसार ही व्यवस्था काम करत आहे. कुणालाही बेड हवा असल्यास कुणीही प्रत्यक्ष रुग्णालयात जाऊ नये, असे सांगून चहल म्हणाले, की मुंबई हे देशातील एकमेव शहर आहे, जिथे खासगी, सार्वजनिक अशा सर्वच ठिकाणच्या कोरोनासाठीच्या बेडस्चे नियोजन महापालिकेकडून केले जात आहे. त्यातही महापालिकेने 24 वॉर्डनुसार तयार केलेल्या वॉर्डस्तरीय टीम्सच्या माध्यमातूनच बेडस्चे नियोजन केले जात आहे. त्यामुळे कुणालाही बेड हवा असल्यास आपापल्या वॉर्डमधल्या वॉररूम टीमशीच संपर्क साधायला हवा. त्यानंतर बेड मिळणार नाही असे होणार नाही. दरम्यान, मुंबईत कोरोनाबाधितांचा आकडा वाढू लागला असला, तरी त्यामुळे घाबरून जाण्याचे काहीच कारण नाही, असे आयुक्त म्हणाले आहेत. हात जोडून विनंती करतो, की मुंबईत कोरोनाची स्थिती आटोक्यात आहे. दहाफेब्रुवारीला मुंबईत दुसरी लाट सुरू झाली, तेव्हापासून आत्तापर्यंत एक लाख 60 हजार नवे कोरोनाबाधित सापडले. त्यातील एक लाख 33 हजारांना लक्षणे नव्हती. 27 हजार लोकांनाच लक्षणे होती. त्यापैकीही फक्त निम्मे लोक हॉस्पिटलमध्ये गेले. आजही आपल्याकडे 17 हजारहून जास्त बेड रिक्त आहेत, असे आयुक्तांनी स्पष्ट केले.
